2023-cü il noyabrın 7-də “Məhsul Sahibi Marafonu” müsabiqəsinin qalibləri bəlli olmuşdur. İki ay davam edən “Məhsul Sahibi Marafonu” müsabiqəsinə ölkə üzrə 8 universitetdən 16 komanda qatılaraq, irəli sürdükləri ideyalar üzərində çalışıblar. Pasha Bank və SUP.VC təşkilatçılığı ilə keçirilən yarışın ilkin mərhələsini uğurla keçən komandalar ikinci mərhələdə birincilik üçün mübarizəyə qatılıblar.
Beləliklə,16 komandadan yalnız 7-si final mərhələsində iştirak etmək hüququ qazana bilib. Xəzər Universitetinin “Virtual Gems” komandası da finalda iştirak edən 7 komandadan biri olub. Təbiət elmləri və mühəndislik fakültəsinin kompüter mühəndisliyi ixtisası üzrə tələbələri – Rəvan Paşayev, Şərqiyyə Rəhimli, Lalə Məhərrəmova və Zeynal Mərdanlıdan ibarət “Virtual Gems” komandası münsiflər heyətinin qarşısında öz layihələrini təqdim edərək, ən yüksək bal ilə qalib adını qazanıb. Qeyd edək ki, komanda heyəti müsabiqəyə səyahətlərdə yük daşınmasının optimallaşdırılması üzrə məhsulu hazırlayıb təqdim etmişdir.
Təbiət elmləri və mühəndislik fakültəsinin Kompüter mühəndisliyi ixtisasının 3-cü kurs tələbələrindən ibarət Xəzər komandasının üzvlərinə mentorluğu Kompüter elmləri departamentinin müəllimi Fariz Həsənli etmiş və onları qələbəyə qovuşdurmuşdur.
Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı və rektor Dos. İradə Xəlilova qalib komanda heyəti ilə görüşərək, onları təbrik ediblər, komanda üzvlərinə gələcək müsabiqələrdə də uğurlar arzulayıblar.