2024-cü il aprelin 22-də Xəzər Universitetində Kahramanmaraş Sütçü İmam Universitetinin nümayəndə heyəti ilə görüş keçirilib. Görüşdə qonaqlar – Kahramanmaraş Sütçü İmam Universitetinin rektoru Prof. Dr. Alptekin Yasim, rektor müavini Prof. Dr. Nuri Kahveci, ikinci rektor müavini Prof. Dr. Orhan Doğan, baş katib Ali Rıza Bekler, təhsil nümayəndəsi Hamiran Amirli, Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı, rektor İradə Xəlilova, İdarəetmə və tələbə işləri üzrə prorektor İsaxan İsaxanlı, İctimai əlaqələr və media üzrə direktor Əlövsət Əmirbəyli, fakültə dekanları və nümayəndələri iştirak ediblər.
Görüş Hamlet İsaxanlının giriş nitqi ilə başlayıb, sonra Xəzər Universitetinin rektoru İradə Xəlilova və Kahramanmaraş Sütçü İmam Universitetinin rektoru Prof. Dr. Alptekin Yasim universitetlərin ümumi fəaliyyəti barədə məlumat veriblər. Davamında Beynəlxalq əlaqələr şöbəsinin müdiri Fatimə Vəliyeva Xəzər Universiteti haqqında təqdimatla çıxış edib.
Çıxışlardan sonra Xəzər Universiteti ilə Kahramanmaraş Sütçü İmam Universiteti arasında memorandum imzalanıb və qarşılıqlı hədiyyə mübadiləsi olub
Görüş çərçivəsində Kahramanmaraş Sütçü İmam Universitetinin rektor və nümayəndə heyətinin Dünya Məktəbinə turu təşkil olunub. Burada onlar kitabxana, sinif otaqları və laboratoriyalarla tanış olduqdan sonra Nailəxanım muzeyinə ekskursiyada iştirak ediblər.
Dünya məktəbi Azərbaycan və rus bölmələrinin direktoru Mərufə Mədətli, Ana məktəbinin rəhbəri Aynur Həsənova, Xəzər Universiteti Humanitar, təhsil və sosial elmlər fakültəsinin dekan müavini Pərvin Kərimova qonaqlara fəaliyyət istiqamətləri barədə geniş məlumat veriblər.
Xəzər Universitetinin Nərimanov kampusuna səfərdə qonaqlar sinif otaqlarına daxil olaraq dərs prosesi ilə də tanış oldular.
Proqram qonaqlar üçün şəhər turu və şam yeməyi ilə başa çatıb.
