2023-cü il yanvarın 9-da Xəzər Universitetində “Xəzər Xəbər” jurnalının baş redaktor müavini, Əməkdar jurnalist Əirza Balayevin anadan olmasının 80 illiyi münasibətilə yubiley tədbiri keçirildi. Tədbirdə universitetin rəhbərliyi və əməkdaşları iştirak edirdilər.
Tədbiri universitetin rektoru Dos. İradə Xəlilova açaraq, səmimi təbrik sözləri söylədi və yubilyara gül dəstəsi verdi. Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı geniş çıxışında Ə.Balayevin “Xəzər Xəbər” jurnalının redaksiyasındakı çoxillik səmərəli fəaliyyətindən, yaradıcılığından danışaraq, yubilyara təşəkkürnamə təqdim etdi.
Universitetin prorektorları Prof. Məhəmməd Nuriyev, Dos. İsaxan İsaxanlı, universitetin İctimai əlaqələr və media üzrə direktoru Əlövsət Əmirbəyli, Dillər və ədəbiyyatlar departamentinin müdiri Dos. Dilbər Zeynalova, Tarix və arxeologiya departamentinin müdiri Telman Nüsrətoğlu, Təbiət elmləri, sənət və texnologiya yüksək təhsil fakültəsinin elmi işlər üzrə dekan müavini Günel Bahəddinova, İngilis dili və ədəbiyyatı departamentinin baş müəllimi Firəngiz Nəsirova və digərləri çıxışlarında yubilyara cansağlığı və fəaliyyətində uğurlar arzuladılar.
Sonda Ə.Balayev tədbirin təşkilinə görə universitet rəhbərliyinə və iştirakçılara təşəkkürünü bildirdi.
