2023-cü il noyabrın 19-da Bakı şəhərindəki 20 nömrəli məktəbdə Xəzər Universiteti və “Dünya” məktəbinin tərəfdaşlığı, Hədəf Şirkətlər Qrupunun təşkilatçılığı ilə “Təhsil Menecerlərinin Forumu” keçirilmişdir. Tədbirdə məktəbin rəhbərliyi və müəllimləri, Xəzər Universitetinin rəhbərliyi və əməkdaşları iştirak etmişlər.
Forumda Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı “Təhsildə keyfiyyət və idarəetmə problemləri” mövzusunda geniş məruzə etmişdir.
Tədbirdə Xəzər Universitetinə və Prof. Akad. Hamlet İsaxanlının yaradıcılığına həsr olunan kitablar da forumun sərgi stendlərindən birində nümayiş olunmuşdur.
Forumun keçirilməsində əsas məqsəd təhsil sistemi və xidmətlərinin effektiv təşkilinə, kadrların idarə olunmasına, təhsildə informasiya texnologiyalarının tətbiqi və istifadəsinə, eləcə də keyfiyyətli tədris üsulu və dünyaya inteqrasiya istiqamətində doğru sayılan yanlışlıqları müəyyənləşdirməyə, dövlət və özəl təhsil müəssisələri arasında işgüzar əlaqələrin və kommunikasiyaların möhkəmləndirilməsinə xidmət edən platforma yaradılmasıdır.