2023-cü il aprelin 26-da Azərbaycan Milli Elmlər Akademiyasında (AMEA) Elm və Təhsil Nazirliyinin Riyaziyyat və Mexanika İnstitutunun təşkilatçılığı ilə Ümummilli lider Heydər Əliyevin 100 illik yubileyinə həsr olunmuş “Riyaziyyat və mexanikanın müasir problemləri” mövzusunda beynəlxalq konfrans keçirilib.
Konfransın açılış iclasında AMEA-nın prezidenti akademik İsa Həbibbəyli, Riyaziyyat və Mexanika İnstitutunun baş direktoru Misir Mərdanov, Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, həmçinin bir neçə xarici qonaq çıxış ediblər. Çıxışlarda Heydər Əliyevin Azərbaycan elminə və təhsilinə verdiyi töhfələrdən, elmin inkişafı üçün həyata keçirdiyi islahatlardan bəhs olunub.
Beynəlxalq konfransda riyaziyyatın aktual problemləri müzakirə edilib, tədbirdə iştirak edən dünyanın müxtəlif ölkələrinin riyaziyyatçı alimləri arasında elmi əlaqələrin genişlənməsi dəstəklənib.
