2023-cü il aprelin 26-da Xəzər Universitetinin Mərmər salonunda universitetin təsisçisi, Direktorlar və Qəyyumlar Şurasının sədri professor, akademik Hamlet İsaxanlının 75 illik yubileyi münasibətilə Əməkdar incəsənət xadimi, görkəmli bəstəkar, Xəzər Universitetinin professoru Cavanşir Quliyevin müəllifi olduğu “Ziyarət” musiqili-poetik kompozisiya nümayiş etdirildi. Musiqili-poetik kompozisiya şair H. İsaxanlının oxucular və ədəbi ictimaiyyət tərəfindən böyük maraqla qarşılanan, Gürcüstandakı ata yurdu doğma Kosalı kəndinə səfərinin təəssüratlarını əks etdirən “Ziyarət” poeması əsasında hazırlanmışdır. Poemadan təsirlənən bəstəkar Cavanşir Quliyev ondan artıq şeir parçası seçmiş və onlara mahnı bəstələmişdir.
Xəzər Universitetinin rəhbərliyi və əməkdaşlarının, qonaqların iştirak etdiyi tədbiri Cavanşir Quliyev açaraq, musiqili-poetik kompozisiyanın H.İsaxanlının yubileyinə bir musiqili-söz çələngi olduğunu söylədi, yaradıcılıq prosesindən danışdı və iştirakçıları əsəri dinləməyə dəvət etdi.
Kompozisiyadakı şeirlər son illərdə H.İsaxanlının poetik yaradıcılığına ardıcıl müraciət edən görkəmli bədii qiraətçi Kamran M. Yunus, mahnılar əməkdar artist Lalə Məmmədova tərəfindən ifa olundu.
Cavanşir Quliyev söz alaraq, yubilyar üçün daha bir mahnı hədiyyəsi hazırladığını söylədi və H.İsaxanlının “Gedin deyin anama” şeirinə bəstələdiyi mahnını ilk dəfə özünun pianoda müşayiəti ilə özü ifa etdi.
Sonda H.İsaxanlı çıxış edərək, musiqili-poetik kompozisiyanın yüksək səviyyədə hazırlanması və ifasına görə təşəkkürünü bildirdi.
