2019-cu il dekabrın 8-11-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı və İngilis dili və ədəbiyyatı departamentinin müdiri Dr. Bahman Amani İran İslam Respublikasında səfərdə oldular.
Dekabrın 8-də professor Hamlet İsaxanlı və Dr. Bahman Amani yolüstü Naxçıvan Universitetində universitetin Tədris və tərbiyə işləri üzrə prorektoru Dr. Hüseyn Bağırsoylu ilə görüşdülər. Dr. Hüseyn Bağırsoylu qonaqları səmimi qarşılayaraq, universitet haqqında məlumat verdi. Görüşdə iki universitet arasında əməkdaşlıq məsələləri müzakirə olundu.
Həmin gün İranın Culfa şəhərinə gələn Xəzər Universitetinin nümayəndələri Tehran Universiteti və Təbriz Universitetinin buradakı Azad İqtisadi Zonada yerləşən beynəlxalq kampuslarında dekanlar, departament müdirləri və əməkdaşlarla görüşdülər.
Dekabrın 9-da professor Hamlet İsaxanlı və Dr. Bahman Amani Naxçıvan Muxtar Respublikası ilə sərhəddə yerləşən Araz Azad İqtisadi Zonasında onun baş müdiri Mohsen Nəriman və təhsil üzrə yardımçısı Yusif Dadaşzadə ilə görüşdülər. Mohsen Nəriman professor Hamlet İsaxanlıya hədiyyə təqdim etdi. Qeyd edək ki, İran qanunvericiliyinə əsasən universitetlər azad iqtisadi zonalarda kampus açaraq, ödənişli qayda ilə tələbə cəlb edə bilərlər. Xəzər Universitetinin nümayəndələri həm Culfa, həm də Araz azad iqtisadi zonalarındakı görüşlərdə Xəzər Universitetinin də bu imkandan istifadə etmək yolları müzakirə olundu.
Həmin gün professor Hamlet İsaxanlı və Dr. Bahman Amani Xoy şəhərində Şəms Təbrizinin məzarını ziyarət etdilər və Şəms Təbrizi Dərnəyinin rəhbəri Mürtəza Bərin və dərnək üzvləri ilə görüşdülər. Professor Hamlet İsaxanlı Xəzər Universitetində Mövlana Ədəbi-Fəlsəfi Araşdırmalar Mərkəzinin (MƏFAM) yaradıldığı və fəaliyyətə başladığı haqqında məlumat verərək, dərnəklə mərkəz arasında əlaqələr qurulmasının məqsədəuyğun olduğunu bildirdi. Mürtəza Bərin də təklifə tərəfdar olduğunu söylədi.
Axşam Təbrizə çatan Xəzər Universitetinin nümayəndələri və Təbrizdə səfərdə olan Türkiyənin Ərzurum Universitetinin rektoru Bülənt Çaxmaqın şərəfinə Təbriz Universitetinin rektoru professor Rza Məcidi tərəfindən şam yeməyi verildi. Söhbət əsnasında professor Hamlet İsaxanlı Azərbaycan, İran və Türkiyə universitetləri arasında “üçbucaq iş birliyi” qurmaq haqqında fikirlərini söylədi və bu, razılıqla qarşılandı.
Dekabrın 10-da Xəzər Universitetinin nümayəndələri Təbriz Universitetində rektorluğun geniş iclasında iştirak etdilər. İkitərəfli əlaqələr imkanları ətraflı müzakirə olundu və Anlaşma memorandumu imzalandı, hədiyyələr təqdim olundu.
Sonra professor Hamlet İsaxanlı və Dr. Bahman Amani universitetin Mühəndislik və Fizika-astronomiya fakültələrində dekanlar, departament müdirləri, müəllim və tələbələrlə görüşüb, fakültələrin işi ilə tanış oldular, müəllim və tələbə mübadiləsi haqqında müzakirələr apardılar.
Həmin gün Xəzər Universitetinin nümayəndələri Təbriz Universitetində Araşdırma həftəsi münasibətilə Şərqi Azərbaycan valisi Məhəmməd Rza Purməhəmmədinin iştirak etdiyi tədbirə qatıldılar və professor Hamlet İsaxanlı çıxış etdi.
Dekabrın 11-də Xəzər Universitetinin nümayəndələri Marağa şəhərinə səfər etdilər. Yolüstü evlərinin qayalar içində tikildiyi Kənduvan kəndində və Nəsirəddin Tusi rəsədxanasında oldular.
Marağa Universitetində rektor Məhəmməd Əli Lutfullahi ilə görüşdə iki universitet arasında əməkdaşlıq haqqında fikir mübadiləsi aparıldı və memorandum imzalanması qərara alındı.
Marağada professor Hamlet İsaxanlı Mövlana Cəlaləddin Ruminin “Məsnəvi”sini farscadan Azərbaycan dilinə tərcümə etmiş şair Heydər Abbasi ilə onun evində görüşdü və səmimi söhbətlə yanaşı onlar bir-birlərinə öz şeirlərini də oxudular. Professor Hamlet İsaxanlı, həmçinin, şair Marağalı Kərimi ilə də görüşdü.
Beləliklə, dörd günlük səfər zəngin təəssüratla başa çatdı.
Səfər haqqında Təbriz və Marağa universitetlərinin veb-saytlarında xəbərlər və fotolar yerləşdirilmişdir:
https://www.maragheh.ac.ir/News/759/%d8%a8%d8%a7%d8%b2%d8%af%db%8c%d8%af-%d8%a8%d9%86%db%8c%d8%a7%d9%86%da%af%d8%b0%d8%a7%d8%b1-%d9%88-%d8%b1%d8%a6%db%8c%d8%b3-%d8%af%d8%a7%d9%86%d8%b4%da%af%d8%a7%d9%87-%d8%ae%d8%b2%d8%b1-%d8%a7%d8%b2-%d8%af%d8%a7%d9%86%d8%b4%da%af%d8%a7%d9%87-%d9%85%d8%b1%d8%a7%d8%ba%d9%87.html
http://tabrizu.ac.ir/fa/news/10823/%D8%A7%D9%85%D8%B6%D8%A7%DB%8C-%D8%AA%D9%81%D8%A7%D9%87%D9%85-%D9%87%D9%85%DA%A9%D8%A7%D8%B1%DB%8C-%D8%AF%D8%A7%D9%86%D8%B4%DA%AF%D8%A7%D9%87-%D8%AA%D8%A8%D8%B1%DB%8C%D8%B2-%D9%88-%D8%AF%D8%A7%D9%86%D8%B4%DA%AF%D8%A7%D9%87-%D8%AE%D8%B2%D8%B1-%DA%A9%D8%B4%D9%88%D8%B1-%D8%A2%D8%B0%D8%B1%D8%A8%D8%A7%DB%8C%D8%AC%D8%A7%D9%86
