2023-cü il sentyabrın 15-də Xəzər Universitetində yeni dərs ilinin başlaması münasibətilə tədbir keçirildi. Tədbirdə universitetin rəhbərliyi, fakültə dekanları və departament müdirləri, müəllimlər, universitetə qəbul olunmuş tələbələr və valideynlər iştirak edirdilər.
Tədbir Azərbaycan Respublikasının Dövlət Himninin ifası ilə başladı. Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı çıxış edərək, universitet haqqında ümumi məlumat verməklə yanaşı, özünəməxsus xüsusiyyətləri haqqında danışdı. Qeyd etdi ki, ingilisdilli ali təhsil müəssisəsi kimi yaranan universitet dünya təhsil sisteminə inteqrasiya yolu ilə inkişaf edərək, yüksək ixtisaslı məzunlar yetişdirməyə nail olmuşdur.
Natiq xüsusilə vurğuladı ki, universitetin dünyaya açılması fonunda tələbələrin milli-mənəvi dəyərlərin fəal daşıyıcıları olması istiqamətində əsaslı iş aparılır. Xəzər Universiteti ali məktəblərin dünya və regional reytinqlərində yüksələn xətt ilə yer almaqdadır.
Universitetin rektoru Dos. İradə Xəlilova tələbələrin təhsili üçün yaradılmış səmərəli şərait haqqında məlumat verdi, onların hərtərəfli inkişafı üçün mədəni və idman tədbirlərinin müntəzəm keçirildiyini, Xəzər Universitetinin tələbə mərkəzli bir ali məktəb olduğunu nəzərə çatdırdı.
Təbiət elmləri və mühəndislik fakültəsinin dekanı Dr. Fəxrəndə Əfəndiyeva, İqtisadiyyat və menecment fakültəsinin dekanı Dr. Ceyhun Məmmədov, Humanitar, təhsil və sosial elmlər fakültəsinin dekanı Dos. Elza Səmədova çıxış edərək, fakültələr və ixtisaslar haqqında məlumat verdilər.
Çıxış edənlər tələbələri və valideynləri təbrik etdilər, tələbələrə uğurlu təhsil həyatı arzuladılar.
Tədbirdə Xəzər Universitetinin Qızlardan ibarət Rəqs Qrupunun ifası təqdim olundu.
Sonda tələbələr auditoriyalara dəvət olundular və Xəzər Universitetində daha bir yeni dərs ili başladı.