2023-cü il iyulun 9-da Bakı Musiqi Akademiyası nəzdində Opera Studiyasının Konsert salonunda Xəzər Universitetinin 52-ci təntənəli məzunluq mərasimi keçirildi. Tədbirdə universitetin rəhbərliyi və əməkdaşları, məzunlar və keçmiş məzunlar, valideynlər və qonaqlar iştirak edirdilər.
Azərbaycanın Dövlət Himninin ifası ilə başlanan tədbirdə sonra universitetin Kamera orkestri (bədii rəhbər universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqova) və Rəqs ansamblı məzunları təbrik etdi. Qeyd edək ki, Kamera orkestri və Rəqs ansamblı tədbiri fasilələrlə sona qədər müşayiət etdi.
Aparıcılar – Beynəlxalq Əlaqələr ofisinin əməkdaşı Fatimə Vəliyeva (ingilis dilində) və Təbiət elmləri, sənət və texnologiya yüksək təhsil fakültəsinin Azərbaycan dili ixtisası üzrə 2-ci kurs magistrantı Siyuan Wang (Azərbaycan dilində) bildirdilər ki, bu gün 388 bakalavr, 133 magistr məzun olur və bu ilki məzunlar arasında artıq Polşa, İtaliya, Fransa, Çin, Estoniya, Çexiya, Türkiyə, İsveç, Rusiya və Şotlandiya kimi ölkələrin nüfuzlu universitetlərinin magistrantı adını qazananlar var.
Sonra aparıcılar məzunları təbrik etmək üçün universitetin rektoru Dos. İradə Xəlilovaya söz verdilər. Rektor çıxışında tələbə – müəllim səyi ilə məzunların əmək bazarına uyğun mütəxəssislər kimi yeni həyata hazırlandıqlarını söylədi və onlara uğurlar arzuladı.
Sonra bakalavr və magistrlərə diplomların təqdim olunmasına başlanıldı. Diplomları universitetin rektoru İradə Xəlilova, prorektorlar – Məhəmməd Nuriyev, İsaxan İsaxanlı, Vlad Vernygora, fakültə dekanları, departament müdirləri və müəllimlər təqdim etdilər. Həmçinin, Xəzər Universitetini fakültələr üzrə birinciliklə bitirən məzunlara – Səlimə Hüseynzadə, Mirsadiq Muxtarov, Həvva Papaxova, Ceyran Heydərova və Faria Joarder Bushra Kamal`a Uğur sertifikatı təqdim olundu.
Tədbirdə universitetin keçmiş məzunları – Azərbaycan Respublikasının Diasporla iş üzrə Dövlət Komitəsi sədrinin müşaviri Emin Rüstəmov, Türkiyənin Hacettepe Universitetinin doktorantı İlahə Yusifli, N saylı hərbi hissənin psixoloqu, II Qarabağ müharibəsinin iştirakçısı Cavad Həşimov, Xəzər Universitetinin fəxri qonağı, ABŞ-ın Florida Beynəlxalq Universitetinin tədqiqatçısı Dos. Şefik Osman məzunları təbrik edib, tövsiyələrini verdilər.
Aparıcılar Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlını səhnəyə dəvət etdilər. Təsisçi Xəzər Universitetinin dünya, o cümlədən Avropa təhsil sisteminin prinsipləri əsasında yaradıldığı və fəaliyyət göstərdiyindən, bunun da nəticəsi olaraq yüksək ixtisaslı kadrlar yetişdirməsindən bəhs etdi, məzunlara xoş arzularını bildirdi.
Sonra Xəzər Universitetinin özünəməxsus ənənələrindən biri – məzunların öz universitetinə, ailəsinə və ölkəsinə sadiqliyi bildirən andiçmə mərasimi oldu.
Tədbir şən musiqi və məzunların alqışları ilə sona çatdı.