2023-cü il martın 14-də Sumqayıt “Dünya” məktəbində “Dünya” məktəbi kompleksinin və Xəzər Universitetinin təsisçisi, universitetin Direktorlar və Qəyyumlar Şurasının sədri professor, akademik Hamlet İsaxanlının 75 illik yubileyi münasibətilə elmi və bədii yaradıcılığına, quruculuq fəaliyyətinə həsr olunmuş “İçimdə yaşar bir səda – Şərlə çarpışan xeyirəm” adlı tədbir keçirildi.
Professorun “Təzadlar”, “Əlkimya” və “Mənim Qarabağım və ya Qarabağ düyünü” kitablarının məzmunu əsasında müəllim və şağirdlərin Azərbaycan, ingilis və rus dillərində hazırladıqları tədris xarakterli kompozisiyalar tədbir iştirakçılarının yüksək marağına səbəb oldu. Xüsusən Hamlet İsaxanlının aktual olan “Mənim Qarabağım və ya Qarabağ düyünü” adlı tədqiqat əsərinin müəllim və şagirdlərin hazırladıqları videoversiya ilə təqdimatı tədbirə xüsusi rəng qatdı. Şagirdlərin yubilyara ithaf olunmuş əl işləri və rəsmlərindən ibarət sərgi, eləcə də “Bahar dünya xalqlarının gözü ilə” adlı bayram festivalı – ABŞ, Böyük Britaniya, Almaniya, İsveçrə, Fransa, Rusiya, Yaponiya, Polşa, Ukrayna, Türkiyə və Azərbaycan xalqlarına məxsus mahnı, rəqs və milli mətbəxin nümayişi tədbir gününü təntənəsi ilə şövqləndirdi.
Sonda qonaqlar Sumqayıt “Dünya” məktəbinin müəllim, şagird və valideynlərinə maraqlı tədbir və əlvan festival üçün dərin təşəkkürlərini bildirdilər.
