Kitab usta pedaqoq, mahir təhsil təşkilatçısı, istedadlı musiqiçi Nailə xanım İsayevanın müasirlərinə məlum olan parlaq surətini, əvəzsiz xidmətlərini gələcək nəsillərə ötürmək, onun əziz xatirəsini əbədiləşdirmək üçün Xəzər Universiteti Direktorlar və Qəyyumlar Şurasının müəyyənləşdirdiyi tədbirlər silsiləsinə uyğun hazırlanmışdır. Bu barədəki qərar da kitabın ilk səhifələrində verilmişdir. Kitabın əvvəlində Nailə xanım İsayevanın qısa həyat tarixçəsi də yer aimışdır. Xəzər Universitetinin təsisçisi, Direktorlar və Qəyyumlar Şurasının sədri, professor, akademik Hamlet İsaxanlı kitaba qısa giriş yazmışdır.
Nailə xanımın kitaba daxil edilmiş səkkiz mahnısının sözləri Hamlet İsaxanlınındır. Mahnılar nota köçürülmüş, fortepiano və səs üçün, həmçinin kamera orkestri və ya xalq çalğı alətləri orkestri üçün partiturası hazırlanmışdır.
Mahnıları fortepiano və səs üçün Cavanşir Quliyev, Sərdar Fərəcov, Ceyhun Allahverdiyev, Sevda Rəhimova, Ağaverdi Paşayev, Yeganə Axundova və Zülfiyyə Sadıqova işləmişlər.
Kitabın bədii tərtibatı Afaq Kərimovaya məxsusdur.
Kitab nəfis şəkildə Xəzər Universiteti Nəşriyyatında çapdan çıxmışdır.
