“Dünya” məktəbi və Xəzər Universitetinin kollektivlərinə ağır itki üz vermişdir. Tanınmış pedaqoq, təhsil təşkilatçısı, Xəzər Universiteti “Dünya” məktəbinin həmtəsisçisi (həyat yoldaşı, Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı ilə birlikdə), uzun illər “Dünya” məktəbinin direktoru olmuş Nailəxanım İsayeva 2021-ci il aprelin 3-də vəfat etmişdir.
Nailəxanım İsayeva 1947-ci il mayın 29-da Quba şəhərində anadan olmuşdur. SSRİ-nin 50 illiyi adına rus dili institutunu (indiki Bakı Slavyan Universiteti) bitirmiş, orta məktəblərdə və Xəzər Universitetində rus dilini tədris etmişdir.
Nailəxanım İsayevanın həyat və fəaliyyəti “Dünya” məktəbi ilə sıx bağlı olmuşdur. Azərbaycanda ilk özəl universitet olan Xəzər Universitetinin nəzdində 1998-ci ildə onun həmtəsisçiliyi ilə yaradılmış “Dünya” məktəbinin qurulması və təşəkkülündə böyük əmək sərf etmişdir. Onun rəhbərliyi altında məktəb Azərbaycan orta təhsil sistemində yenilikçi tədris ocağı kimi şöhrətlənmiş, ictimai nüfuz qazanmışdır. 2009-cu ildə “Dünya” məktəbi Beynəlxalq Bakalavriat Təşkilatı – International Baccalaurate Organization -IBO-nun üzvlüyünə qəbul edilərək, beynəlxalq status almışdır. “Dünya” məktəbi 2012-2013-cü tədris ilində Azərbaycanda “İlin ən yaxşı məktəbi” adına layiq görülmüşdür.
Nailəxanım İsayeva 2010-cu ildən Xəzər Universiteti Direktorlar və Qəyyumlar Şurasının müşaviri idi.
Nailəxanım İsayeva pedaqoji fəaliyyəti ilə yanaşı mahnı bəstələməklə də məşğul olur, mahnıları görkəmli müğənnilər tərəfindən ifa edilirdi.
Nailəxanım İsayeva şəxsiyyəti etibarilə də nüfuz sahibi idi. İşgüzarlığı, prinsipiallığı, mülayim təbiəti, xeyirxahlığı ilə çalışdığı kollektivlərin dərin hörmətini qazanmışdı.
Nailəxanım İsayevanın əziz xatirəsi onu tanıyanların qəlbində daim yaşayacaqdır.
Allah rəhmət eləsin!