2023-cü il dekabrın 19-da – Azərbaycan Vokalçıları III Beynəlxalq Festivalının beşinci günündə dünya şöhrətli ifaçılar Fidan və Xuraman Qasımovalara həsr olunmuş “Sənətin işığında” adlı konsert keçirilib. Konsertdən öncə tanınmış musiqişünas, Əməkdar incəsənət xadimi, professor Zemfira Qafarova çıxış edərək, Fidan və Xuraman Qasımova bacılarının Azərbaycan musiqi mədəniyyətinin və vokal ifaçılıq sənətinin formalaşmasındakı xidmətlərindən, milli vokal ifaçılıq məktəbinin ənənələrini ləyaqətlə qoruyub yaşatmalarından bəhs edib.
Sonra Azərbaycan Respublikasının Əməkdar artistli İnarə Babayeva və Xəzər Universitetinin Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqovanın təqdimatında keçirilən konsert tamaşaçılar tərəfindən böyük rəğbətlə qarşılanıb.
İnarə Babayeva Azərbaycan və dünya bəstəkarlarının əsərlərini Zülfiyyə Sadıqovanın müşayiəti ilə ifa etmişdir. Zülfiyyə Sadıqova ayrıca F.Listin “Fa minor” konsert etüdünü də səsləndirmişdir.
Konsertdə Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı da iştirak etmişdir.
