“NAİLƏXANIM İSAYEVA”
Seriyanın (redaktoru Hamlet İsaxanlı) ”Nailəxanım İsayeva” adlı 8-ci kitabı Xəzər Universitetinin Nəşriyyatında çapdan çıxmışdır. Müəllifi filologiya elmləri doktoru, Dos. İsaxan İsaxanlıdır. Kitab tanınmış pedaqoq və maarifçi Nailəxanım İsayevanın həyat və fəaliyyətindən bəhs edir.
Kitabın “Həyatı və təhsili”, “Ailəsi” bölümlərində Nailəxanım İsayevanın həm doğulub boya-başa çatdığı ailəsindən, həm də şəxsi ailəsindən söhbət açılır. Ailə üzvləri təqdim olunur. “Maarifçilik-quruculuq fəaliyyəti” bölümündə həyat yoldaşı Prof. Akad. Hamlet İsaxanlı ilə birlikdə Xəzər Universitetinin, sonralar Bakı, Sumqayıt və Gəncə “Dünya” məktəblərinin yaradılması və fəaliyyəti sahəsindəki birgə gərgin əməkdən, əslində mübarizədən, Nailəxanım İsayevanın “Dünya” məktəbi kompleksinə nümunəvi rəhbərliyindən geniş söhbət açılır.
Kitabın “Musiqi fəaliyyəti” bölümündə Nailəxanım İsayevanın bəstələdiyi mahnılardan və onların məşhur və tanınmış ifaçılarından bəhs olunur.
“Şəxsiyyəti” bölümündə Nailəxanım İsayevanın zəngin mənəvi aləmi açılır. Sonda yerli və xarici həmkarlarının, məşhur sənət adamlarının onun haqqında fikirləri verilmişdir.
Kitabdakı bölümlər çoxlu fotoşəkillərlə müşayiət olunur.
