2022-ci il iyunun 22-də Xəzər Universitetində dizayn ixtisası tələbələrinin diplom müdafiəsi keçirildi. Tədbirdə universitetin təsisçisi, Direktorlar və Qəyyumlar Şurasının sədri professor, akademik Hamlet İsaxanlı, Azərbaycan Rəssamlar İttifaqının sədr müavini, Xalq rəssamı Ağaəli İbrahimov, Mədəniyyət və İncəsənət Universiteti Rəngkarlıq kafedrasının baş müəllimi, komissiya sədri Mətin Şərifov və komissiya üzvləri, universitetin Dekorativ-Tətbiqi Sənət Muzeyinin direktoru, rəssam Afaq Kərimova, dizayn ixtisasının müəllim heyəti və valideynlər iştirak edirdilər.
Tələbələrin diplom layihələrinin rəhbəri – Azərbaycan Rəssamlar İttifaqının üzvü, tanınmış rəssam-dizayner, Xəzər Universitetinin müəllimi Anar Əsədovun qısa məlumatından sonra tələbələr – Xanım Rəhimova, Leyla Səmədova, Əminə İsayeva, İsmayıl Niftalıyev və Fidan Babayeva öz layihələrini təqdim etdilər və sualları cavablandırdılar.
Rəssam Afaq Kərimova, professor, akademik Hamlet İsaxanlı, Xalq rəssamı Ağaəli İbrahimov və digərləri çıxış edərək, layihələr barədə fikir və tövsiyələrini bildirdilər.
Layihələr komissiya tərəfindən müsbət qiymətləndirildi.
