2022-ci il mayın 27-də Xəzər Universitetinin Mərmər salonunda görkəmli pedaqoq, təhsil təşkilatçısı, “Dünya” məktəbinin qurucusu və rəhbəri olmuş Nailə xanım İsayevanın anadan olmasının 75 illiyinə həsr olunmuş ədəbi-musiqili tədbir keçirildi.
“Dünya” məktəbinin təşkilaçılığı ilə keçirilən tədbirdə “Dünya” məktəbinin və Xəzər Universitetinin rəhbərliyi və əməkdaşları, ölkənin görkəmli mədəniyyət xadimləri və digər qonaqlar iştirak edirdilər.
Tədbirin musiqi hissəsini universitetin Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqovanın bədii rəhbərliyi ilə Xəzər Universitetinin Kamera orkestri idarə edirdi.
Tədbir aparıcı – Azərbaycan teatr və kino aktyoru, rejissor, bədii qiraətçi, “ARRI”, “Altın Şafran”, “Vaqif Səmədoğlu” mükafatları laureatı Kamran M. Yunisin ifasında Hamlet İsaxanlının şeirlərinin səslənməsi ilə başlandı.
“Dünya” məktəbi Multimedia Mərkəzinin Hailə xanım İsayeva haqqında hazırladığı sənədli film nümayiş etdirildi. Filmdə görkəmli maarif xadiminin “Dünya” məktəbini qurması, ona rəhbərlik etməsi təsirli səhnələrlə dolğun əks olunmuşdu.
Sonra “Dünya” məktəbinin şagirdləri mahnı oxuyaraq, rəqs edərək məharətlərini göstərdilər.
Xalq artisti Xuraman Qasımova tədbirdə çıxış edərək, Nailə xanım haqqında xatirələrini bölüşdü.
Xalq artistləri Gülyanaq Məmmədova, İlqar Muradov, Xəzər Universitetinin müəllimi Məhsəti Cabbarova Nailə xanım İsayeva, Cavanşir Quliyev və digər bəstəkarların mahnılarını ifa etdilər.
Tədbir xoş əhval-ruhiyyə ilə başa çatdı.