Xəzər Universitetində görkəmli pedaqoq, təhsil təşkilatçısı, “Dünya” məktəbinin qurucusu və rəhbəri olmuş Nailə xanım İsayevanın xatirəsini əbədiləşdirməklə əlaqədar silsilə tədbirlər davam edir.
2022-ci il mayın 27-də universitetdə Nailə xanım Mədəniyyət Mərkəzinin açılışı oldu. Tədbirdə “Dünya” məktəbi və Xəzər Universitetinin rəhbərliyi və əməkdaşları, qonaqlar iştirak edirdilər.
Universitetin İdarəetmə və tələbə işləri üzrə prorektoru İsaxan İsaxanlı çıxış edərək, Nailə xanım İsayevanın xatirəsini əbədiləşdirmək üçün görülmüş işlərdən və həyata keçiriləcək tədbirlərdən danışdı. Qeyd etdi ki, neşə il əvvəl universitetdə mədəniyyət mərkəzinin yaradılmasının təşəbbüskarı məhz Nailə xanım olmuş və mərkəz bilavasitə onun rəhbərliyi və iştirakı ilə qurulmuşdur. Buna görə də, mərkəzin bundan sonra onun adını daşıması təbiidir.
Yenidən qurulmuş Nailə xanım Mədəniyyət Mərkəzinin tərtibçi-dizayneri, universitetin Dekorativ-Tətbiqi Sənət Muzeyinin direktoru, xalçaçı rəssam Afaq Kərimova çıxışında mərkəzin tərtibi haqqında ümumi məlumat verdi.
Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı lenti kəsərək, mərkəzin açılışını etdi.
Mərkəzə daxil olan iştirakçılara Afaq Kərimova Nailə xanımın fəaliyyətini dolğun əks etdirən fotostendlər, eksponatlar və şəxsi əşyaları haqqında konkret məlumatlar verdi və nümayiş etdirilən büstünün müəllifinin universitetin müəllimi, heykəltəraş Kamran Əsədovun olduğunu bildirdi.
İştirakçılar Nailə xanım İsayevanın anadan olmasının 75 illiyi ərəfəsində mərkəzə baxışdan təsirlənərək ayrıldılar.