2022-ci il iyulun 8-də Bakı Musiqi Akademiyası Opera Studiyasının konsert salonunda Xəzər Universiteti 51-ci məzunluq tədbirini keçirdi.
Tədbirdə universitetin rəhbərliyi, professor-müəllim heyəti, məzunlar, valideynlər və qonaqlar iştirak edirdilər.
Mərasim Azərbaycan Respublikasının Dövlət Himninin ifası ilə başlandı. Sonra Xəzər Universitetinin Kamera orkestri məzunları musiqi ilə salamladı.
Universitetin rektoru dosent İradə Xəlilova məzunları təbrik edərək, yeni həyat yollarında onlara uğurlar arzuladı.
Qeyd olundu ki, bugünkü məzunlarla birlikdə universiteti 4641 bakalavr, 964 magistr bitirmişdir. Onlardan 1285 nəfəri universiteti fərqlənmə diplomu ilə başa vurmuşdur. Bu gün isə 355 bakalavr və 87 magistr məzun olur.
Məzunlar səhnəyə dəvət olunaraq, diplomların təqdim olunmasına başlanıldı. Diplomları rektor İradə Xəlilova, prorektorlar Məhəmməd Nuriyev, İsaxan İsaxanlı, Vlad Vernygora, fakültə dekanları və departament müdirlərı, müəllimlər təqdim etdilər.
Xəzər Universitetini 2021-2022-ci tədris ilində birinciliklə bitirən məzunlara (Nayanathara Ranmalie Amunarawa, Muxtar Məmmədov, Məleykə Əhmədova, Yulia Baghirova (Lovina), Röyal Mahmudov) Uğur sertifikatı təqdim olundu.
Məzunlar adından İqtisadiyyat və menecment fakültəsinin məzunu Şücaət Şahidli çıxış edərək, təhsil illərində onlar üçün yaradılmış şəraitə və yüksək təhsilə görə universitetin rəhbərliyinə bə professor-müəllim heyətinə təşəkkür bildirdi.
Universitetin keçmiş məzunları – tədbirdə həm də məzun valideyni kimi iştirak edən Anar İsgəndərli, Birləşmiş Ərəb Əmirliklərində “AJ Group”un qurucusu Ceyran Əfəndi və Sahibkarlığın İnkişaf Fondunun İdarə Heyətinin sədr müavini Eldar Həmidov çıxış edərək, nail olduqları uğurlarda Xəzər Universitetindəki təlim və təhsilin əhəmiyyətindən danışdılar.
Universitetin doktorantura pilləsini bitirərək, ölkənin elm və təhsil ocaqlarında müvafiq elmi şuralarda fəlsəfə doktoru elmi dərəcəsi almaq üçün uğurla dissertasiya müdafiə etmiş məzunları təltif və bütün məzunları təbrik üçün səhnəyə Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı dəvət olundu.Təltifdən sonra Təbiət elmləri və mühəndislik fakültəsinin məzunu Aqşin Qaraşlı və Humanitar, təhsil və sosial elmlər fakültəsinin məzunu Xanım Rzayeva Xəzər Universitetinin məzunluq andını səsləndirdilər və bütün məzunlar “And içirik!” nidası ilə cavab verdilər.
Tədbir professor, akademik Hamlet İsaxanlının çıxışı ilə başa çatdı. H. İsaxanlı universitetdə yaradılmış əlverişli təhsil mühitindən, yalnız yüksək keyfiyyətli mütəxəssislər yox, eyni zamanda hərtərəfli inkişaf etmiş gənc nəsil yetişdirilməsindən, professor-müəllim heyətinin gərgin və səmərəli işindən danışdı, məzunlara tövsiyələrini verdi və onlara uğurlar arzuladı.
Qeyd edək ki, Xəzər Universitetinin tələbələrdən ibarət rəqs ansamblı tədbir boyu ifaları ilə alqışlandı.
