2020-ci il yanvarın 28-də Xəzər Universitetinin Mərmər salonunda Xəzər Universitetinin elmi uğurları və Təbriz Universiteti ilə əməkdaşlığa həsr edilmiş konfrans keçirildi.
Konfransda universitetin rəhbərliyi, fakültə dekanları, departament müdirləri və əməkdaşlar, İranın Təbriz universitetindən gəlmiş nümayəndələr iştirak edirdilər.
Konfransı universitetin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, son illərdə universitetdə elmi – tədqiqat işlərinin uğurla davam etdirildiyini, nüfuzlu jurnallarda məqalələrin çapının artdığını və bu fəaliyyətin təşəkkürə, təltifə layiq olduğunu söylədi, Təbriz universitetinin nümayəndələrini salamladı.
İngilis dili və ədəbiyyatı departamentinin müdiri Dr. Bahman Amani Təbriz universitetinin nümayəndələrini – Elektronika və kompüter mühəndisliyi departamentinin dosentləri Ebrahim Babai, Seyid Hadi Əqdəsi Ələmdari, həmin departamentin professoru Kazem Zarei və Təhsil və psixologiya departamentinin dosenti Rasul Heşmatini iştirakçılara təqdim etdi, onların fəaliyyəti haqqında ətraflı məlumat verdi. Dosent Ebrahim Babai öz çıxışında Təbriz Universiteti ilə Xəzər Universitetinin əməkdaşlığa başlamasının mühüm hadisə olduğunu və bu əməkdaşlığın səmərəli bəhrələr verəcəyinə əmin olduqlarını bildirdi.
Universitetin İnkişaf mərkəzinin direktoru Raziyə İsayeva universitet haqqında təbrizli qonaqlar üçün nəzərdə tutulan geniş təqdimatla çıxış etdi.
Sonra elmi – tədqiqat sahəsindəki uğurlara görə təltifolunma mərasimi başlandı. Sertifikat və hədiyyələr professor Hamlet İsaxanlı başda olmaqla universitetin rəhbərliyi, fakültə dekanları, departament müdirləri və təbrizli qonaqlar tərəfindən təqdim olundu.
Professor Hamlet İsaxanlı universitetin Fizika və elektronika departamenti, Riyaziyyat departamenti və Həyat elmləri departamentinin işini yüksək qiymətləndirdi və onların müdirləri – Nuru Səfərov, Əli Hüseynli və Asəf Ömərova sertifikat və hədiyyələr təqdim etdi. Şəxsi nailiyyətə görə sertifikat və hədiyyələr İradə Xəlilova, Rəsul Muradi, Elvin Əzizbəyov, Nuru Səfərov, Sevda Qəribova, Fəridə Tatardar, İbrahim Nəbiyev, Rövşən Abbasov, Elmira Məmmədova-Kekeç, Səidə Şərifova, Nazim Kərimov, Mehdi Kiyasatfar, Cavid Ocaqi, Səbinə Sadığova, İlmar Qəhrəmanov və Şahram Qromiyə təqdim olundu.
Tədbirdə universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərliyi ilə universitetin Kamera orkestri konsert proqramı ilə çıxış etdi. Solist Xəzər Universitetinin müəllimi, Müslüm Maqomayev adına Akademik Dövlət Filarmoniyasının solisti Məhsəti Cabbarova idi.
Həmin gün axşam Xəzər Universitetinin Buzovnadakı Konfrans və İstirahət Mərkəzində Təbriz Universitetinin nümayəndələri və təltif olunanların şərəfinə ziyafət verildi.
***
Təbriz Universitetinin nümayəndələri – Ebrahim Babai, Seyid Hadi Əqdəsi Ələmdari, Kazem Zarei və Rasul Heşmati səfər müddətində Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı ilə görüşərək, iki universitet arasında əməkdaşlıq məsələlərini müzakirə etmişlər.
Qonaqlar universitetin Mərkəz kampusu ilə tanış olmuş, fakültə, departament əməkdaşları və tələbələrlə görüşlər keçirmiş, “Dünya” məktəbində və Sumqayıt “Dünya” məktəbində olmuşlar. Onlar üçün Bakı şəhərinə ekskursiya təşkil edilmişdir.
