Artıq neçə illərdir ki, Xəzər Universiteti Heydər Əliyev Fondunun və Mədəniyyət Nazirliyinin təşkilatçılığı ilə hər il sentyabrın 18-30-da keçirilən Üzeyir Hacıbəyli Beynəlxalq Musiqi festivallarının iştirakçısı olur. Növbəti festivalın avqust ayının əvvəlində elan olunmuş proqramında da ənənəvi iştirakçı Xəzər Universiteti yer almışdı.
Sentyabrın 27-də festival çərçivəsində Xəzər Universitetinin Fikrət Əmirov Konfrans-Konsert Mərkəzində universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın təşkilatçılığı və bədii rəhbərliyi ilə universitetin Kamera orkestrinin geniş konserti oldu.
Tədbirdə Xəzər Universitetinin rəhbərliyi, əməkdaşları və tələbələri, ölkənin musiqi və mədəniyyət xadimləri, o cümlədən Azərbaycan Bəstəkarlar İttifaqının katibi, xalq artisti Sərdar Fərəcov iştirak edirdilər.
Tədbiri giriş sözü ilə açan Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı Üzeyir Hacıbəylinin yaradıcılığından və ənənəvi olaraq keçirilən festivalın əhəmiyyətindən danışdı. Sonra dahi bəstəkar haqqında film nümayiş olundu.
Kamera orkestrinin konsert repertuarında Üzeyir Hacıbəyli, Fikrət Əmirov, Tofiq Quliyev, Rauf Hacıyev və Arif Məlikov kimi dahi bəstəkarlarla yanaşı, Xalq artisti Sərdar Fərəcov, Xalq artisti Vasif Allahverdiyev, Əməkdar incəsənət xadimi Ceyhun Allahverdiyev və Sevda Rəhimovanın əsərləri yer almışdı.
Solistlər – əməkdar artistlər Fəridə Məmmədova, Lalə Məmmədova, Elnarə Məmmədova (Rusiya) və Anton Ferştandt, Beynəlxalq müsabiqələr laureatı, Prezident mükafatçısı Taleh Yəhyayev, Beynəlxalq müsabiqələr laureatı Mahir Tağızadə, Elnarə Məmmədova, Beynəlxalq müsabiqələr laureatı, Prezident mükafatçısı Ceyla Seyidova, Gülşən Akın (Türkuyə), Respublika müsabiqələr laureatı Emin Zeynallı və Bakı Musiqi Akademiyasının doktorantı Rüfət Piriyev idilər.
Qeyd edək ki, konsertdə Hamlet İsaxanlının sözlərinə yazılmış mahnılar, o cümlədən “Fələyin işi” (bəstəkar Sevda Rəhimova) və “Bir zamanlar” (bəstəkar Ceyhun Allahverdiyev) mahnıları ilk dəfə ifa olundu.
Tamaşaçıların alqışları ilə müşayiət edilən konsert Üzeyir Hacıbəyli festivalına layiqli töhfə oldu.
