[:az]Xəzər Universiteti Peşə inkişaf mərkəzinin təşkilatçılığı ilə Avropanın ən böyük tələbə təşkilatı olan Avropa Tələbələr Birliyi İdarə Heyətinin nümayəndələri Xəzər Universitetində qonaq oldular. Onlara universitet haqqında ətraflı məlumat verildikdən sonra qonaqları universitetin təsisçisi, Direktorlar və Qəyyumlar şurasının sədri professor Hamlet İsaxanlı qəbul etdi. O, qonaqlara ölkədəki təhsil imkanları, Xəzər Universitetinin tarixi, tələbələrin həyata keçirdikləri müxtəlif layihələr haqqında məlumat verdi. Görüşdə universitetin prorektoru professor Rafiq Əhmədov, Peşə inkişaf mərkəzinin koordinatoru İsgəndər Ağayev və başqaları universitetin təhsil həyatı və tələbələrin təhsildən kənar fəaliyyətlərinin müxtəlif istiqamətləri haqqında məlumat verdilər. Avropa Tələbələr Birliyinin nümayəndəsi Karl Agius Xəzər Universitetinin, həqiqətən, digər universitetlərdən fərqli olduğunu söylədi və bir çox istiqamətlərdə gələcək əməkdaşlıqla bağlı müzakirələr aparıldı.[:]