2021-ci il fevralın 15-də Gəncə şəhərində Xəzər Universitetinin Gəncə “Dünya” məktəbinin açılışı oldu. Məktəbin açılış tədbirində Gəncə Şəhər İcra Hakimiyyətinin başçısı Niyazi Bayramov, Xəzər Universiteti və “Dünya” Təhsil Kompleksinin təsisçisi professor Hamlet İsaxanlı, Xəzər Universitetinin rektoru dosent İradə Xəlilova, universitetin və təhsil kompleksinin əməkdaşları, Gəncə ziyalıları və ictimaiyyəti, məktəbin şagird-müəllim və valideyn kollektivi iştirak edirdilər.
Tədbir Azərbaycan Respublikasının Dövlət Himninin ifası ilə açıldı. Azərbaycanın Vətən Müharibəsində şəhid olmuş qəhrəman döyüşçülərin xatirəsi bir dəqiqəlik sükutla yad edildi.
Tədbirdə Gəncə Şəhər İcra Hakimiyyətinin başçısı Niyazi Bayramov çıxış edərək, Gəncə şəhərində belə bir təhsil ocağının yaranmasından məmnunluğunu vurğuladı. İcra başçısı məktəbin şagird-müəllim kollektivinə işlərində uğurlar arzuladı.
Professor Hamlet İsaxanlı Gəncə “Dünya” məktəbinin yalnız IB məktəbi kimi fəaliyyətə başladığına görə məktəb və IB proqramı haqqında iştirakçılara geniş məlumat verdi. O, “Dünya” məktəblərinin hər birinin açılışında həmtəsisçi Nailəxanım İsayevanın xüsusi rolunu və böyük əməyi olduğunu qeyd etdi.
Xəzər Universitetinin rektoru dosent İradə Xəlilova çıxış edərək, universitet adından məktəbə rəsm əsəri hədiyyə etdi.
Sonra iştirakçılar “Dünya” Təhsil Kompleksi haqqında filmə baxaraq, kompleksin uzun illər ərzindəki fəaliyyəti ilə yaxından tanış oldular.
“Dünya” Təhsil Kompleksinin fəaliyyətini əks etdirən sərgi də iştirakçıların böyük marağına səbəb oldu.
Tədbirdən sonra Xəzər Universiteti və “Dünya” Təhsil Kompleksinin əməkdaşları Vətən Müharibəsi şəhidlərinin məzarlarını ziyarət etdilər.